Дар шаҳри Душанбе таваллуд ёфтааст. Пас аз мактаби миёнаи №77 факултети журналистикаи Донишгоҳи Русияву Тоҷикистонро (Славянӣ) хатм намудааст. Аз айёми кӯдакӣ ба телевизион ва санъати сухан майл дошт. Дар синни 12-солагӣ аз озмун гузашта, ровии барномаи телевизионии кӯдаконаву наврасони «Баҳористон» гардидааст.

Аз соли 2010 то соли 2018 барномаҳои сербинандаро пеш бурда, баъдан кори муҳарририро низ омӯхта, собит сохтааст, ки журналистика барои ӯ на танҳо касб, балки роҳи ботинӣ ва тарзи ҳаёт аст. Соли 2018 фаъолияти касбиашро дар Ширкати байнидавлатии радиотелевизионии «Мир» ба ҳайси мухбир оғоз кардааст. Дар ин ҷо худро ҳамчун ровии бодиққат ва ҳассосе нишон дод,  ки  метавонад дар паси ҳар як хабар таърихи инсониро пайдо намояд.

Аз соли 2020 ба ҳайси ровии барномаи «Шабака» дар канали агентии иттилоотии «Азия-Плюс» фаъолият карда, баъдтар самти робитаҳои ҷамъиятиро дар ширкати мобилии Zet-Mobile роҳбарӣ намуда, таҷрибаи журналистиро бо усулҳои муосири PR омезиш додааст. Аз моҳи октябри соли 2025 ба ҳайси ровии радио Navo фаъолият дорад. Эфир барои ӯ фазои зиндаи андешаҳо, эҳсосот ва илҳом аст. Ӯ бовар дорад, ки ҳар сухане, ки аз қалб гуфта мешавад, метавонад рӯҳияро дигар кунад ва одамонро ба ҳам наздик созад.

Ӯ мутмаин аст, ки қуввати радио дар самимият аст. Ҳар барнома ба муколама табдил меёбад, ки дар он на танҳо хабарҳо, балки ҳисси инсонӣ, эҳсосоти зинда ва таърихи воқеӣ садо медиҳанд. Маҳз дар ин аст усули хоси ӯ – бо содагӣ дар бораи муҳимтарин сухан гуфтан ва эфирро ба шунаванда наздиктар гардондан. Овози ӯ бо дақиқӣ, гармӣ ва ифодаи равшанаш шинохта мешавад. Дар эфир анъана ва замонавият, далел ва эҳсосот ба ҳам мепайванданд, ки муҳити эътимод ва муоширати озодро ба вуҷуд меорад.

Бо иштироки ӯ радиои NAVO бо тарзи  нав садо медиҳад – тоза, ростқавлона ва инсонворона наздик ба ҳар як шунаванда.

Шиори ҳаётӣ: «Ҳар сухане, ки сидқан  гуфта мешавад, қодир аст ҷаҳонро дигар кунад».